باسيل: نعمل على قانون لامركزية موسّعة يصحّح الانماء المناطقي وقانون صندوق ائتماني يصحّح الانماء الوطني
اشار رئيس "التيار الوطني الحر" النائب جبران باسيل الى انه "اليوم نعمل على قانون لامركزية موسّعة يصحّح الانماء المناطقي، وقانون صندوق ائتماني يصحّح الانماء الوطني، ومع مشروع بناء الدولة بيصير عنا منظومة قوانين ونظام بتسمح للبنانيين يعيشوا برفاهية وبكرامة بدل الذلّ والمهانة يلّي عم يعيشوهم على يد منظومة الفساد".
ولفت باسيل خلال عشاء التيار الوطني الحر في كسروان، الى انه "اذا كان مقياس الاحجام السياسية هو محبّة الناس، فأكيد انّو الجنرال ميشال عون كسر مقاييس المحبّة بينه وبين الناس بكسروان الفتوح: هون المحبّة ما لها زمن ولا حدود، وهون العماد عون احتلّ القلوب وعمل نايب عن المنطقة، ومن هون بلّش بالـ 2005 معركة استعادة التوازن والشراكة... احتلّ القلوب واحتل المقاعد الخمسة، من دون خدمات، وبرهن انّو كسروان ما بتمشي بس بالخدمات، وما بتعتبر غريب يلّي مش من منطقتها اذا كان قريب من فكرها السياسي ووجدانها الوطني".
اضاف "تخيّلوا شو يعني كسروان وجبيل وعكار والبقاع والجنوب ما يعودوا ناطرين لتتكرّم عليهم المالية وتدفع لهم عائداتهم ويصيروا هم قادرين يأمنوا لحالهم حل للنفايات والطرق والطاقة المتجدّدة، عم تتخيّلوا شو يعني ما يعود بدّنا المالية تبتز، لتدفع للمتعهّد حقوقه ليبني معمل كهرباء او محطّة غاز؟".
ولفت الى ان "التيار بمكان والمنظومة بمكان آخر، افتروا بحقّنا وحمّلونا فسادهم، والان بدات تظهر الحقائق اولاً بالقضاء الاوروبي، وقريباً بالقضاء الاميركي، وبعدها بالتدقيق الجنائي وانشاءالله لا تكمل الاّ بالقضاء اللبناني. صدر من كم يوم، بعد تأخير 10 أشهر، وعرقلة سنتين، تقرير الفاريز ومرسال، وعلى الرغم من اختفاء اجزاء منه وبنيانه على معلومات ناقصة، بدأت تنكشف ارقام واسماء وشكّل ادانة علنية للمجرم المالي رياض سلامة ومنظومته المالية والسياسية، ولفت الى ان تقرير الفاريز هو رأس جبل الجليد وهو البداية ونحن مكمّلين، لنا الفخر ان العماد عون اوّل من طالب بالتدقيق الجنائي من فرنسا سنة 1998، وبدا نضاله السياسي من اجله سنة 2005 حتى توقّع بالـ 2021. وفخرنا انّ الوزير السابق منصور بطيش، ابن كسروان، هو اوّل من فضح الفجوة المالية بمصرف لبنان وجريمة الهندسات المالية بـ 4 نيسان 2019. ولنا الشرف اليوم اننا نريد استكمال التدقيق الجنائي بمصرف لبنان وبباقي المؤسسات والادارات واوّلها وزارة الطاقة".
واشار التيار الى ان "رياض سلامة سرق شعب ولم يرفّ له جفن، والمستفيدين من رياض اقلامهم الصفراء متل وجوههم، وكلماتهم السوداء متل نواياهم، ما توقفت تشوّه الحقيقة وتضلّل الناس وتتهم التيار بالانهيار. وسوف نبقى نلاحقهم، "بنكرجيي" وسياسيين واعلاميين وقضاة امام القضاء اللبناني والدولي وامام الجمعيات والمنظمات الخارجية، وبالبرلمان اللبناني، لنعرف مين وقدّيش استفاد كل واحد من الهندسات، ومين وقدّيش حوّل كل واحد مصرياته لبرّا بالوقت يلّي شعب بكامله ما قدر يسحب شي من امواله".
اضاف قائلا: "كل مورد وثروة بالبلد امانة برقبتنا، النفط والغاز امانتنا وحافظنا عليهم لليوم، ولن نتركهم بأيادي من منعوهم عقود من الزمن وعرقلوهم سنين من حياتنا واوقفوا مراسيمهم اربع سنوات من ايّامنا وروّحوا الفرصة علينا بوقتها واليوم راكضين يتصوّروا بالهليكوبتر".
وختم قائلا: "كنا نقول لهم: اتركونا نبني، معمل الكهرباء، ومحطّة الغاز وسد المياه، وروحوا تصوروا واعملوا التدشين بس اتركونا نعمل، "امّا انكم تمنعونا وتتصوّروا، اي الله ما قالها! لهيك سنبقى نقاتلكم قتال المناضلين حتى نسقّط كل منظومتكم، وكما كان سقوط امين صندوقكم المالي عظيماً، سيكون سقوطكم، يا ابناء المنظومة، حتمياً، وسيكون انتصاركم، يا ابناء التيار، حتمياً".